„Við höfum fengið margar ábendingar frá viðskiptavinum okkar undanfarnar vikur í tengslum við verðskrá bankans. Við höfum hlustað á þær ábendingar og ákveðið að hækka ekki verð á þjónustu við okkar viðskiptavini út þetta ár. Við verðum þó að setja þann fyrirvara að ytri áhrifaþættir, eins og t.d. breytingar á skatti, gætu leitt til verðbreytinga,“ segir Höskuldur H. Ólafsson, bankastjóri Arion banka, í tilkynningu sem hann sendir viðskiptavinum bankans og mbl.is greinir frá.
Í verðskrá bankans voru boðaðar verðhækkanir á gjaldkeraþjónustu sem áttu að taka gildi 1. mars næstkomandi. Í september síðastliðnum sagði Höskuldur að stóru bankarnir hefðu allir opnað sjálfvirk útibú og benti hann á að 40% þeirra sem kæmu í útibú bankans gerðu það til að taka út peninga, en slíkt væri hægt að gera sjálfvirkt. Viðskiptavinir myndu nú hafa val um að greiða hærra verð fyrir þjónustu gjaldkera eða ekkert í sjálfvirkri þjónustu.
„Við höfum nú endurskoðað þær hækkanir og ákveðið að falla frá þeim. Við munum hins vegar ekki falla frá nýju afgreiðslugjaldi sem snýr fyrst og fremst að viðskiptavinum annarra banka og mun skila sér í betri bankaþjónustu við viðskiptavini okkar. Þetta er gjald vegna innborgana reiðufjár og úttekta reiðufjár af reikningum í öðrum bönkum,“ segir í tilkynningu bankans.