Kauphöll Nasdaq á Íslandi hefur samþykkt umsókn Arion banka hf. um töku hlutabréfa félagsins til viðskipta á Aðalmarkaði Kauphallarinnar næstkomandi föstudag 15. júní. Þó er það með þeim fyrirvara að samþykkið gæti verið dregið til baka ef ekki næst fullnægjandi dreifing á bréfum bankans í uppgjöri hlutafjárútboðsins á mánudag, 18. júní.

Þann sama dag verða sænsk heimildarskírteini („SDR’s“)  tekin til viðskipta á Nasdaq Stockholm. Samþykkið er eins og áður segir háð því að Kauphöllinni hafi borist fullnægjandi staðfesting á dreifingu hlutafjár.  Áætlað er að uppgjöri hlutabréfaútboðs Arion banka ljúki þann 18. júní 2018.

Komi í ljós við uppgjör hlutabréfaútboðsins að skilyrði reglna fyrir útgefendur fjármálagerninga um dreifingu hlutafjár hafi í reynd ekki verið uppfyllt áskilur Kauphöllin sér rétt til þess að draga samþykki sitt fyrir umsókn félagsins um töku hlutabréfa til viðskipta til baka.

Til og með 18. júní eru viðskipti með hlutabréf Arion banka skilyrt því að samþykki Kauphallarinnar verði ekki dregið til baka, sbr. umfjöllun um skilyrt viðskipti (e. conditional trading) í lýsingu Arion banka. Verður þetta í fyrsta sinn sem þetta fyrirkomulag er viðhaft við töku hlutabréfa til viðskipta á Íslandi, en þetta fyrirkomulag er algengt innan annarra kauphalla Nasdaq Nordic.

Frá töku hlutabréfanna til viðskipta og til og með 18. júní 2018 verða bréf félagsins merkt í viðskiptakerfi Kauphallarinnar með kóðanum WI („When Issued“) til þess að vekja athygli á þessari stöðu. Frekari upplýsingar um útboðið má finna í kafla E.3 í samantekt lýsingar Arion banka.

Leiðarar, pistlar og skoðanadálkar um Arion banka:

Fleiri fréttir um málefni Arion banka: