Arion banki hefur tekið yfir alla hluti í TravelCo hf. Stefnt er að því að finna nýjan eiganda að félaginu sem fyrst. Þetta kemur fram í tilkynningu frá bankanum sem send var fjölmiðlum fyrr í dag.
Stofnandi TravelCo er Andri Már Ingólfsson, oft kenndur við Primera, en flugfélagið féll á síðasta ári. Unnið hefur verið að því að halda þeim hluta rekstrarins sem talinn er getað lifað til framtíðar gangandi. Í þeim hópi er TravelCo en félagið á og rekur ferðaskrifstofur á Norðurlöndunum öllum. Hér á landi hefur reksturinn farið fram undir flaggi Heimsferða og Terranova.
„Aðeins er um að ræða breytingu á eignarhaldi en dagleg starfsemi og þjónusta ferðaskrifstofanna helst óbreytt. Markmið Arion banka er að tryggja áframhaldandi starfsemi ferðaskrifstofanna og hagsmuni bankans,“ segir í tilkynningu Arion banka.
Í tilkynningu þakkar Andri starfsfólki fyrir að hafa byggt félagið upp í samstarfi við hann. „Mér er efst í huga þakklæti til alls þess frábæra starfsfólks sem ég hef starfað með og hefur tekið þátt í uppbyggingu félagsins á undanförnum árum. TravelCo er eitt öflugasta fyrirtæki Norðurlanda á sviði ferðaþjónustu og ég óska félaginu og starfsfólki þess alls hins besta í framtíðinni sem ég veit að verður björt,“ segir Andri.