Furðustrandir eftir Arnald Indriðason var sem fyrr vinsælasta bókin síðustu vikuna fyrir jól, þriðju vikuna í röð en bókin er jafnframt mest selda bókin hér á landi á þessu ár.
Þá var skáldsagan Ég man þig eftir Yrsu Sigurðardóttur í öðru sæti sem fyrr og Léttir réttir Hagkaups eftir Friðriku Hjördísi Geirsdóttur í þriðja sæti.
Þetta kemur fram í vikulegu yfirliti Rannsóknarseturs verslunarinnar þar sem birtur listi yfir söluhæstu bækurnar hér á landi. Metsölulistinn hefur verið birtur vikulega í desember og byggir á upplýsingum frá flestum bókaverslunum landsins og öðrum verslunum sem selja bækur (t.d. stórmörkuðum, bensínstöðvum o.fl.).
Svar við bréfi Helgu eftir Bergsvein Birgisson skaust upp í fjórða sæti listans síðustu vikuna fyrir jól og ýtti ævisögu Gunnars Thoroddsen eftir Guðna Th. Jóhannesson niður í fimmta sæti.
Á vef Rannsóknarsetursins kemur fram að á síðustu fimm dögunum fyrir jól seldust tæplega 120 þúsund bækur eða um 24 þúsund bækur á dag.
Yrsa ýtir Mikka mús til hliðar
Sem fyrr segir er Furðustrandir mest selda bókin á árinu en þar á eftir koma Léttir réttir Hagkaups. Þá var Ég man þig í þriðja sæti og ýtti Stóru Disney matreiðslubókinni niður í fjórða sæti en sú bók hélt toppsætinu yfir mest seldu bækurnar langt fram eftir hausti.
Hér að neðan má sjá listann yfir mestu seldu bækurnar í síðustu viku auk metsölulistans á árinu. Athygli vekur að skýrsla rannsóknarnefndar Alþingis, sem verið hefur meðal 10 mest selda bóka á árinu, er dottinn af listanum en skýrslan var um tíma mest selda bókin hér á landi.
Metsölulisti 20. desember - 26. desember 2010
- Furðustrandir - Arnaldur Indriðason
- Ég man þig - Yrsa Sigurðardóttir
- Léttir réttir Hagkaups - Friðrika Hjördís Geirsdóttir
- Svar við bréfi Helgu – Bergsveinn Birgisson
- Gunnar Thoroddsen - Guðni Th. Jóhannesson
- Lífsleikni Gillz - Egill Gillz Einarsson
- Hreinsun – Sofi Oksanen
- Eldað með Jóa Fel - Jóhannes Felixson
- Morgunengill – Árni Þórarinsson
- Ljósa – Kristín Steinsdóttir
Uppsafnaður metsölulisti tímabilið 1. janúar - 26. desember 2010
- Furðustrandir - Arnaldur Indriðason
- Léttir réttir Hagkaups - Friðrika Hjördís Geirsdóttir
- Ég man þig - Yrsa Sigurðardóttir
- Stóra Disney matreiðslubókin - Ýmsir höfundar
- Gunnar Thoroddsen - Guðni Th. Jóhannesson
- Eyjafjallajökull - Ari Trausti Guðmundsson & Ragnar Th. Sigurðsson
- Lífsleikni Gillz - Egill Gillz Einarsson
- Svar við bréfi Helgu – Bergsveinn Birgisson
- Hreinsun – Sofi Oksanen
- Bók fyrir forvitnar stelpur! - Þóra Tómasdóttir/Kristín Tómasdóttir