Árni Páll Árnason, formaður Samfylkingarinnar, hefur boðað til blaðamannafundar í Kringlunni á Alþingi klukkan 15 í dag.
Ekki er ólíklegt að Árni Páll muni á fundinum upplýsa um hvort hann ætli að gefa kost á sér áfram sem formaður Samfylkingarinnar, þegar landsfundur flokksins verður haldinn í byrjun júní.
Þrír hafa þegar lýst því yfir að þeir gefi kost á sér til formanns og eru það þau Oddný G. Harðardóttir, Magnús Orri Schram og Helgi Hjörvar. Jóhanna Sigurðardóttir, fyrrverandi forsætisráðherra og formaður Samfylkingarinnar, hefur lýst yfir stuðningi við Oddnýju í formannskjörinu.