Í morgun voru kynntar breytingar á yfirmannastöðum hjá Samskipum í kjölfar þess að tilkynnt var í gær að Knútur G. Hauksson annar tveggja forstjóra félagsins væri á förum til Heklu. Michael F. Hassing fyrrverandi forstjóri Mærsk á Bretlandseyjum verður nýr forstjóri Samskipa við hlið Ásbjörns Gíslasonar sem flytur sig um set til Íslands.
Ásbjörn Gíslason forstjóri, sem leitt hefur útrás Samskipa erlendis undanfarin ár, hefur tekið við rekstri félagsins á Íslandi af Knúti G. Haukssyni sem hverfur til annarra starfa. Undir Ásbjörn heyrir einnig stjórn Íslandsdeildanna erlendis og frystivöruflutningar félagsins. Nýr forstjóri Samskipa við hlið Ásbjörns verður Michael F. Hassing, sem verið hefur forstjóri Mærsk skipafélagsins á Bretlandseyjum. Hann mun einkum sinna ört vaxandi gámaflutningastarfsemi Samskipa erlendis og flutningsmiðlunarþjónustu félagsins.
?Með þessum breytingum á yfirstjórninni og skýrari verkaskiptingu forstjóranna erum við að styrkja félagið enn frekar og skerpa áherslurnar í starfseminni,? segir Ólafur Ólafsson, starfandi stjórnarformaður Samskipa. ?Ásbjörn hefur leitt af krafti þá hröðu uppbyggingu sem orðið hefur hjá okkur erlendis og vænti ég þess að sami kraftur einkenni störf hans hér heima. Þá er það gríðarlegur ávinningur að fá í okkar raðir jafn reynslumikinn mann í alþjóðlegum siglingum og flutningastarfsemi og Michael Hassing er.? Báðir forstjórarnir munu gerast hluthafar í Samskipum sem styrkir félagið enn frekar að mati stjórnarformannsins.
Michael F. Hassing er með 25 ára reynslu hjá AP Møller-Mærsk Group í alþjóðlegum siglingum og flutningastarfsemi. Hann hefur gegnt fjölmörgum ábyrgðarstörfum hjá félaginu, t.d. í Singapore, Hong Kong, Hollandi og Japan. Áður en Michael gekk til liðs við Samskip var hann forstjóri Mærsk á Bretlandseyjum. Hann hefur einnig sinnt fjölmörgum trúnaðarstörfum í stjórnum fyrirtækja sem tengjast flutningastarfsemi á alþjóðavettvangi.
?Við Ólafur Ólafsson höfum þekkst lengi og því veit ég hvaða væntingar hann er með um framtíð Samskipa. Því stóðst ég ekki freistinguna þegar mér var boðið að slást í hópinn,? segir nýi forstjórinn, sem jafnframt er þriðji Daninn í stjórnunarteymi Samskipa. Stutt er síðan Flemming R. Jacobs, fyrrum samstarfsmaður Michaels hjá Mærsk, tók sæti í stjórn Samskipa og þar átti sæti fyrir landi þeirra Karsten M. Olesen.
?Við hjá Samskipum höfum sett markið hátt og ætlum okkur að verða eitt stærsta flutningafyrirtækið á okkar sviði í Evrópu en um leið að verða afburðafyrirtæki í greininni,? segir Ólafur Ólafsson ?og þar mun umfangsmikil reynsla Michaels F. Hassing svo sannarlega nýtast okkur. Áherslurnar eru líka skýrar og vel afmarkaðar. Við ætlum að vera leiðandi í gámaflutningum innan Evrópu og munum innan skamms flytja yfir eina milljón gámaeininga á ári. Jafnframt erum við að efla frystivöruflutninga félagsins, sérstaklega milli Asíu og Evrópu, og nýta til fullnustu þá afburða þekkingu sem er fyrir hendi hjá félaginu á þeirri starfsemi.
Það var árið 1998 að Samskip hófu skipulega útrás með kaupunum á Bruno Bishoff í Þýskalandi. Þar með var varðaður sá vegur sem félagið hefur fetað örugglega síðan. Samskip hafa skipulega eignast að fullu eða hluta ýmis fyrirtæki sem styðja og styrkja þessa útrás og þá stefnu sem félagið hefur markað sér. Skemmst er t.d. að minnast kaupanna á hollenska skipafélagsinu Geest North See Line í febrúar sl. og á Kloosterboer frystigeymslunum í Hollandi, Noregi og Færeyjum nú í lok apríl.
Frystiflutningar Samskipa verða áfram á ábyrgð Ásbjörns Gíslasonar, þó svo hann færi sig um set frá Rotterdam og heim til Íslands og taki við resktri starfseminnar þar af Knúti G. Haukssyni, sem er að taka við sem forstjóri bifreiðaumboðsins Heklu eftir að hafa verið forstjóri Samskipa á Íslandi sl. tvö ár og þar áður aðstoðarforstjóri í rúm tvö ár.
?Samhliða forstjóraskiptunum erum við að breyta áherslum í stjórnun félagsins,? segir Ásbjörn. ?Við hverfum frá þessari hefðbundnu skiptingu verkefna milli Íslands og útlanda og einbeitum okkur að hverju þjónustusviði fyrir sig. Þannig mun ég halda áfram að stjórna uppbyggingu frystiflutninganna sem og starfsemi Íslandsdeildanna erlendis. Jafnframt verður lögð áhersla á að tengja þá starfsemi enn betur við reksturinn á Íslandi,? segir Ásbjörn, sem nú snýr heim eftir sex ára dvöl ytra.
?Það er ótrúlegt hversu mikil uppbygging hefur átt sér stað hjá félaginu heima á þessum tíma. Það verður samt ekki slegið slöku við og ætlum við okkur að efla innanlandsstafsemina enn frekar, þannig að hún haldi áfram að dafna hér eftir sem hingað til.?
Samskip reka nú 49 skrifstofur í 21 landi, auk þess sem umboðsmenn eru starfandi um allan heim. Starfsmenn félagsins eru um 1.300 talsins. Áætluð velta Samskipa og dótturfélaga á þessu ári er um 45 milljarðar króna. Á þeirra vegum eru alls 21 gámaskip í föstum áætlunarsiglingum og eru áætlaðir heildargámaflutningar félagsins á þessu ári ríflega 900 þúsund gámaeiningar. Samskip og dótturfélagið Silver Sea eru einnig með 15 frystiskip á sínum snærum og er gert ráð fyrir að flutningar félagsins á frosnum fiski nemi 1,1 milljón tonna á þessu ári. Þar til viðbótar eru Samskip nú með önnur 15 skip í ýmsum öðrum verkefnum, þ.á.m. í þungaflutningum fyrir olíuiðnaðinn í Noregi og í löndunum í kringum Svartahaf.
