„Þetta er mikið áhyggjuefni. Það verður mjög erfitt að fjármagna framtíðarvöxt og endurreisa hagkerfið ef þetta verður svona lengi.“
Þetta segir Gylfi Arnbjörnsson, forseti ASÍ í samtali við Viðskiptablaðið aðspurður um framlengingu gjaldeyrishafta Seðlabankans.
Seðlabankinn tilkynnti í morgun að bankinn hefði ákveðið að afnema ekki gjaldeyrishöft þar sem nauðsynlegt skilyrði til þess væru ekki enn til staðar að mati bankans.
Næsta endurskoðun á reglum um gjaldeyrismál mun eiga sér þann 1. september n.k.
Gylfi segir þetta mjög slæm tíðindi fyrir hagkerfið hér á landi. Hann segir að erlendir bankar muni nú forðast það að koma með fjármagns til landsins og því verði erfitt að fjármagna vöxt hér á landi.
„Hagvöxtur verður ekki til nema hann sé fjármagnaður,“ segir Gylfi og bætir við:
„Úr því að þetta varð niðurstaðan, af hverju í ósköpunum eru stýrivextir þá ekki strax keyrðir niður?“
Gylfi segir nauðsynlegt að Seðlabankinn keyri niður stýrivexti sem fyrst. Ljós sé að stýrivextir hafi nú lítil sem engin áhrif á fjármagnsflutningar þar sem þeir séu ekki leyfðir.
Þá segir hann ljóst að verðbólgan muni hríðlækka á næstunni og því sé einnig nauðsynlegt að lækka stýrivexti sem allra fyrst.
