Áslaug Arna Sigurbjörnsdóttir, háskóla-, iðnaðar- og nýsköpunarráðherra verður með vinnuaðstöðu víða um landið á kjörtímabilinu. Ráðuneytið hefur tilkynnt um dagsetningar og dagsetningar fyrir næstu vikur en staðsetningar skrifstofu Áslaugar Örnu verða auglýstar síðar.
Á hverri starfsstöð verður Áslaug Arna með opna viðtalstíma þar sem öll áhugasöm eru velkomin í milliliðalaust spjall um málefni á borði háskóla-, iðnaðar- og nýsköpunarráðuneytisins. Þá verða fyrirtækjaheimsóknir einnig hluti af dagskrá ráðherra.
„Hugmyndin kviknaði þegar ég var að hugsa hvernig ráðuneyti sem væri búið til árið 2022 myndi starfa. Með þessu kynnist ég enn betur starfsemi sem tengist ráðuneytinu um allt land og fæ tækifæri til að prófa að starfa annars staðar en í Reykjavík,“ segir Áslaug Arna.
Frá því að nýtt háskóla-, iðnaðar- og nýsköpunarráðuneyti tók til starfa í febrúar hefur ráðuneytið verið opið fyrir störfum óháð staðsetningu. Í því felst að starfsemi ráðuneytisins er ekki bundin við einn ákveðin stað þrátt fyrir að aðalstarfsstöð þess sé staðsett í Reykjavík. Starfsmönnum ráðuneytisins býðst því að vinna að heiman eða frá þeim stað á landinu sem best hentar hverju sinni.
„Ráðherra er þar engin undantekning og með því að staðsetja skrifstofu ráðherra um víðs vegar um landið gefst mikilvægt tækifæri til aukinnar tengslamyndunar og samstarfs við háskóla, stofnanir, fyrirtæki, sveitarfélög og einstaklinga um land allt,“ segir í tilkynningunni.
Dagsetningar og staðsetning á skrifstofu Áslaugar Örnu næstu vikurnar:
- 18. ágúst – Snæfellsbær
- 29. ágúst – Mosfellsbær
- 5. september – Árborg
- 12. september – Hafnarfjörður
- 22. september – Múlaþing
- 28. september – Akureyri
- 10. október – Ísafjörður
- 13. október – Reykjanesbær
- 20. október – Vestmannaeyjar
- 27. október – Akranes
Dagsetningar eru birtar með fyrirvara um breytingar á dagskrá ráðherra.
