© Gunnhildur Lind Photography (Gunnhildur Lind Photography)
Hér að neðan eru athugasemdirnar birtar í heild. Fyrri athugasemdin á við frétt sem birtist á síðu 6 og seinni á við frétt á síðu 10.
Athugasemd við frétt sem ber fyrirsögnina: „Mikið tap hjá ALMC í fyrra“:
ALMC er ekki banki, eins og ranghermt er í frétt Viðskiptablaðsins, heldur eignaumsýslufélag utan um eignir og skuldir sem tilheyrðu Straumi-Burðarási fjárfestingarbanka hf. Í lok árs 2010, voru heildareignir ALMC 1.057 milljónir evra og skuldir við aðra en hluthafa 419 milljónir evra. ALMC er að mestu í eigu erlendra fjárfesta.
Straumur fjárfestingarbanki hf. er dótturfélag ALMC. Straumur hóf starfsemi sem banki 1. september síðastliðinn. Í lok árs 2010 voru eignir Straums 1,1 milljarður króna og skuldir nánast engar.
Með þessar staðreyndir í huga ætti lesendum Viðskiptablaðsins að vera ljóst að umrædd frétt inniheldur rangfærslur og þar er ýmsu ruglað saman.
Athugasemd við frétt sem ber fyrirsögnina: „Stjórnað af Deutsche Bank og hæft til að eiga Straum“:
Við samþykkt nauðasamninga ALMC hf. (áður Straums-Burðaráss) var kröfum umbreytt í hlutdeildarskírteini (samsett hlutabréf og skuldabréf) í ALMC. Þar með færðust yfirráð yfir félaginu í hendur kröfuhafa þess. Deutsche Bank AG í Amsterdam heldur á yfir 99% af hlutdeildarskírteinum ALMC í hlutverki vörsluaðila (e. Custody) fyrir hönd hinna eiginlegu hluthafa sem eru að langstærstu leyti alþjóðlegir fjárfestar. Það er því ekki rétt að Deutsche Bank stýri ALMC eins og segir í fyrirsögn fréttarinnar.
Fjármálaeftirlitið skipaði Straumi-Burðarási fjárfestingabanka hf. (nú ALMC hf.) skilanefnd þann 9. mars 2009. Skilanefnd tók yfir vald fyrrum stjórnar og hluthafafundar. Frá þessu tímamarki töpuðu hluthafar bankans öllu hlutafé sínu, þar á meðal Samson Global Holding sarl. Samson Global Holding sarl átti ekki kröfur á hendur ALMC og varð því ekki eigandi félagsins í tengslum við nauðasamninga sem samþykktir voru 2010.
