Vegna umræðu um skoðanakönnun á trausti kjósenda til forystufólks stærstu stjórnmálaflokkanna, sem Viðskiptablaðið birti síðastliðinn fimmtudag (10. apríl 2013), er rétt að taka eftirfarandi fram:

Viðskiptablaðið hefur í samstarfi við MMR reglulega kannað viðhorf almennings til ákveðinna mála auk þess að standa fyrir viðamikilli könnun meðal stjórnenda stærstu fyrirtækja landsins.

Meðal þess sem spurt hefur verið um er traust á forystumönnum í stjórnmálum, fylgi frambjóðenda í efstu sæti á framboðslistum og keppinauta um formannssæti stóru flokkanna. Þessar kannanir hafa oftast birst í kringum kosningar, prófkjör eða landsfundi.

Sjálfstæðisflokkurinn hefur aldrei í sögu flokksins mælst með eins lítið fylgi í skoðanakönnunum og ástæða þess hefur að einhverju leyti verið rakin til óánægju með störf formanns flokksins. Því var talið eðlilegt að kanna hug svarenda til þess hversu líklegt væri að þeir myndu kjósa Sjálfstæðisflokkinn ef varaformaður flokksins myndi leiða hann í kosningabaráttunni. Niðurstaðan var afdráttarlaus og tilefni til fréttaskrifa.

Það er fráleitt að aðrir hagsmunir en lesenda hafi ráðið ákvörðun ritstjóra Viðskiptablaðsins að birta þessa könnun. Þá er rangt, sem komið hefur fram, að einstaka starfsmenn ritstjórnar hafi starfað fyrir varaformann Sjálfstæðisflokksins og engu breytti um þessa ákvörðun að útgefandi blaðsins hafi fyrir tæpum áratug unnið við framboð hans. Markmið Viðskiptablaðsins er að segja fréttir með hagsmuni lesenda að leiðarljósi en ekki annarra.

Björgvin Guðmundsson,
ritstj. Viðskiptablaðsins