Hlutabréf í Hampiðjunni gengu kaupum og sölum fyrir alls 219 milljónir króna í 136 viðskiptum í dag sem er 10. mesta velta frá skráningu félagsins á First north hliðarmarkaðinn árið 2007 og mesti fjöldi viðskipta á einum degi, svo miklu munar.

Félagið – sem hefur verið skráð í Kauphöllina frá 1993 – færði sig upp á aðalmarkað á ný í morgun með pomp og prakt, en Hjörtur Erlendsson forstjóri þess hringdi inn opnun markaða í netaverkstæði veiðafæraframleiðandans við Skarfagarða.

Við það gátu hátt í 4 þúsund þátttakendur í nýafstöðnu hlutafjárútboði félagsins fyrst farið að stunda viðskipti með bréfin eftir að hafa fengið þau afhent í morgun. Hampiðjan er nú 9. stærsta félag á aðalmarkaði með ríflega 80 milljarða króna markaðsvirði.

Tæpur helmingur viðskipta dagsins var með 4.166 bréf eða færri, þann fjölda sem 500 þúsund króna áskrift í A-bók skilaði, en fjárfestar voru óskertir upp að þeirri fjárhæð. Athygli vekur þó að alls voru 53 viðskipti innan viðskiptakerfis Kauphallarinnar að frumkvæði kaupanda, á móti 76 að frumkvæði seljanda (slíkt er ekki gefið upp fyrir utanþingsviðskipti).