Ríkið gaf starfsmönnum ríkisins 63,5 milljónir króna af skattfé á síðasta ári. Fram kemur í Morgunblaðinu í dag að embætti Ríkisskattstjóra notaði í fyrra 10,1 milljón króna í gjafir, eða sem sem nemur 37 þúsund krónum á hvern starfsmann. Til viðbótar fengu starfsmenn Áfengis- og tóbaksverslunar ríkisins í ár sumargjöf, gönguskó og flíspeysu, sem kostaði 36 þúsund krónur. Kostnaður ÁTVR vegna þessa nam 13,5 milljónum króna.
Skafti Harðarson, formaður Samtaka skattgreiðenda, segir í samtali við Morgunblaðið að ríkisstofnanir verði að gæta hófs við gjafaúthlutanir.
„Þetta er fráleitt. Ekkert er óeðlilegt við það að ríkisstofnanir gefi starfsmönnum sínum einhverjar minniháttar gjafir í tilefni jóla, en það þarf að gæta hófs í gjafaúthlutunum. Mér finnst þetta vera sérkennileg nálgun á ráðstöfun almannafjár,“ segir hann.