Fjárfestar frá Hong Kong hafa byrjað að flytja gull út úr héraðinu í auknum mæli vegna mótmæla og innleiðingu kínverskra stjórnvalda á nýjum þjóðaröryggislögum í síðasta mánuði. Financial Times segir frá .
Fjárfestar hafa fært allt að 10% af gulleignum sínum úr Hong Kong til annarra landa líkt og Singapúr og Sviss á síðustu 12 mánuðum, samkvæmt Joshua Rotbart sem á gullmiðlarastofuna J.Rotbart & co., sem er staðsett í Hong Kong.
Sjá einnig: Gullverð ekki hærra síðan 2011
„Margir viðskiptavinir okkar telja Hong Kong vera áhættusamara heldur en önnur umdæmi í dag,“ er haft eftir Rotbart. Hann segist hafa séð tafarlaus viðbrögð frá íbúum Hong Kong sem vildu geyma gullið sitt annars staðar í kjölfar þjóðaröryggislaganna.
Sumir viðskiptavinir hans hafa einnig orðið áhyggjufullir yfir aukinni glæpatíðni í borginni. Innbrotum fjölgaði um 47% á fyrri helmingi 2020 úr 786 í fyrra í 1.156 í ár.
