Auður Warren Buffett fór yfir hundrað milljarða dala í fyrsta sinn í gær. Einungis fjórir aðrir eiga meiri auðæfi en Buffett samkvæmt lista Forbes yfir milljarðamæringa heims.
Auðæfi Buffett kemur að nær öllu leyti frá eignarhlut hans í fjárfestingarfélaginu Berkshire Hathaway. Hann á um 15% af hlutabréfum Berkshire í A-flokki en gengi þeirra fór yfir 400 þúsund dali í fyrsta sinn í gær.
Buffett, sem var um tíma ríkasti maður heims, tók við Berkshire árið 1965 en félagið var þá vefnaðarfyrirtæki. Berkshire á í dag meira en níutíu fyrirtæki og hlutabréf í eignasafni fjárfestingafélagsins voru 281 milljarður dala að andvirði í árslok 2020, að því er kemur fram í frétt Reuters .
Jeff Bezos, stofnandi Amazon, trónir á toppi listans með nærri 180 milljarða dala auðæfi. Á eftir honum kemur Elon Musk, stofnandi Tesla, með 165 milljarða dala. Bernard Arnault og fjölskylda, sem standa að baki tískusamsteypunnar LVMH, eru í þriðja sæti með 160 milljarða dala. Bill Gates, sem var lengi efstur á listanum, situr í dag í fjórða sæti en auður hans er metinn á 125 milljarða dala.
Buffett hefði líklega náð hundrað milljarða dala markinu fyrr en hann hefur frá árinu 2006 gefið hlutabréf í Berkshire Hathaway að andvirði 37 milljarða dala til góðgerðamála, þar á meðal til Bill & Melinda Gates Foundation.
