Undirritaður hefur verið samningur milli Sjóvá og Auðhumlu svf. um hóprekstrarstöðvunartryggingu fyrir mjólkurframleiðendur.
Í tilkynningu vegna samningsins segir að tilgangur vátryggingarinnar sé að greiða í allt að 24 mánuði þann tekjumissi sem mjólkurframleiðendur kunna að verða fyrir komi til bótaskylds tjóns úr brunatryggingu þeirra með þeim afleiðingum að röskun verður á framleiðslunni eða hún stöðvast alveg. Sama gildir ef óveðurstjón hafa slík áhrif á framleiðsluna.
Samningurinn markar viss tímamót því bæði er hér um að ræða nýjung í vátryggingavernd fyrir bændur og aldrei áður hafa bændur tryggt sig með því fyrirkomulagi sem samningurinn kveður á um.
Að frumkvæði Sjóvá voru teknar upp viðræður um þróun þessarar vátryggingalausnar fyrir alla kúabændur innan Auðhumlu, en Sjóvá hefur í nokkur ár haft á boðstólnum sérstaka rekstrarstöðvunarvernd fyrir mjólkurframleiðendur. Í samningnum er m.a. kveðið á um samstarf til þess að þróa tryggingarverndina frekar jafnframt því sem Sjóvá mun hafa milligöngu um að veita aðang að sérfræðingum í því skyni að veita faglega forvarnaráðgjöf um ráðstafanir í fjósum til þess að koma í veg fyrir tjón eða draga úr alvarleika þeirra.
Með þessu samstarfi félaganna er stigið ákveðið skref til hagsbóta fyrir mjólkurframleiðendur sem mun styrkja enn frekar undirstöður greinarinnar, segir í tilkynningunni.
