„Aukinn kaupmáttur og vaxandi væntingar er jafnan ávísun á aukna kaupgleði,“ segir í fréttatilkynningu Rannsóknarseturs verslunarinnar um Smásöluvísitöluna. Þar segir að þess sjást meðal annars merki í neyslu á mat og drykk, velta í dagvöruverslunum eykst jafnt og þétt. Í febrúar var velta dagvöruverslanna 3% meiri en í sama mánuði í fyrra og að jafnaði hefur velta dagvöruverslanna aukist um 6 prósentustig síðastliðið ár. „Þar sem verð á matvælum fer lækkandi er magn þess sem keypt meira en velta í krónum gefur til kynna. Velta áfengisverslunar vex einnig og var 8% meiri í febrúar en í sama mánuði í fyrra,“ segir í fréttinni.

Það vekur þó athygli greiningaraðilanna að í hinum mikla hagvexti, sem er meðal annars drifinn áfram af miklum hagvexti, skuli velta í fataverslun dragast saman. Velta fataverslana var 12,4% minni í febrúar síðastliðnum en í sama mánuði í fyrra. Á tólf mánaða tímabili lækkaði samt sem áður verð á fötum um 7,3%. „Þess ber að geta að fataverslunum hér á landi hefur farið fækkandi frá áramótum, en það er mikilvægur hluti skýringarinnar. Veltutölurnar byggja á upplýsingum frá öllum stærstu verslunarkeðjum, sem selja föt hér á landi. Sumar þeirra hafa lokað hluta af fataverslunum sínum,“ segir í frétt RSV.

Áhrif netverslunar

Að mati RSV er hæg að ætla að hluti skýringarinnar á minnkandi fataverslun sé aukin netverslun frá útlöndum auk þess að sterkar vísbendingar séu að landsmenn kaupi stóran hluta fata sinna þegar þeir ferðast til útlanda. „Þetta á hins vegar ekki við um skóverslun því hún jókst um 23,7% í febrúar. Verð á skóm í síðasta mánuði var 6,1% lægra en í sama mánuði í fyrra,“ er tekið fram.

Hraður vöxtur var jafnframt í húsgagnaverslun, en hún jókst um 13,9% á tólf mánaða tímabili, sem og í byggingavöruverslun, sem jókst um 14,2% frá febrúar í fyrra.

Dregur úr vexti raftækjaverslunar

Eftir langt tímabil vaxtar í raftækjaverslunum og verslunum með skyldar vörur, virðist sem heldur hafi dragið úr vextinum, að því sem kemur fram í frétt RSV. Sala á minni raftækjum, svokölluðum brúnum vörum, jókst vissulega um 10,3% í febrúar frá febrúar í fyrra en velta stærri heimilistækja var svipuð og í fyrra.

„Greiðslukortavelta heimilanna innanlands var 57,2 milljarðar kr. í febrúar. Kortavelta erlendra ferðamanna hér á landi var 16,8 milljarðar kr. sem er næstum 30% af innlendu veltunni. Tölur um einstaka útgjaldaliði erlendar kortaveltu hér á landi sýnir að langstærstu upphæðir sem fara til verslana er til kaupa í dagvöruverslunum. Hins vegar virðist sem dragi úr vexti veltu á kaupum útlendinga á útivistarfatnaði, sem e.t.v. má rekja til styrkingar krónunnar að undanförnu. Athygli vekur að debetkortavelta Íslendinga í útlöndum jókst um 54% frá febrúar í fyrra, samkvæmt tölum Seðlabankans ,“ kemur fram að lokum.