Ben Bernanke, seðlabankastjóri, sagði í gær að meiri óvissa ríkti nú en áður um hvert bandaríska hagkerfið stefndi og ákvarðanir um vaxtastefnu peningamálayfirvalda mundi ráðast á næstunni. Á fundi með efnahagsdeild Bandaríkjaþings sagði Bernanke að hjöðnun á fasteignamarkaði væri áhyggjuefni en rekja má samdrátt í hagkerfinu til byrjunar hennar síðasta vor. Staða fasteignalána sem bera hærri vexti en venjulega fasteignalán (e. subprime mortage) vekti upp frekari spurningar um stöðu mála á fasteignamarkaði.

Þrátt fyrir þetta ítrekaði Bernanke þá skoðun að seðlabankayfirvöld telji að hófsamur hagvöxtur verði á næstu ársfjórðungum.að því gefnu að óvissuþættirnir hafi ekki afdrifarík áhrif. Hann segir að stefna bankans í peningamálum muni leggja grunn að áframhaldandi vexti og halda verðbólgu niðri. Þessi ummæli voru meðal annars túlkuð af sérfræðingum að vaxtahækkanir séu ekki líklegar á næstunni. Hins vegar voru viðrbrögð markaða vestanhafs á þá leið að helstu hlutabréfavísitölur lækkuðu.