Sjálfkjörið var í stjórn Eimskipafélags Íslands á framhaldsaðalfundi félagsins í gær. Ekki tókst að kjósa löglega stjórn á upphaflegum aðalfundi þar sem stjórnarkjörið uppfyllti ekki lög um kynjahlutföll í stjórnum. Í kjölfarið dró Vilhjálmur Vilhjálmsson, fyrrverandi forstjóri HB Granda, framboð sitt í aðalstjórn til baka og bauð sig fram í varstjórn . Því var sjálfkjörið í stjórnina.
Þá var Baldvin Þorsteinsson, kjörinn stjórnarformaður á ný, og Hrund Rudolfsdóttir, verður áfram varaformaður stjórnar. Í frétt RÚV var greint frá því að Baldvin hefði verið þriðji í kjöri um stjórnarformannsembættið á eftir Lárusi L. Böndal og Vilhjálmi Vilhjálmssyni áður en í ljós kom að stjórnarkjörið stæðist ekki lög. Baldvin er framkvæmdastjóri viðskiptaþróunar hjá Samherja og sonur Þorsteins Más Baldvinssonar, forstjóra Samherja. Samherji er stærsti hluthafi Eimskip með 27% hlut.
Tveimur dögum fyrir aðalfundinn kom til orðaskaks á milli Baldvins og Más Guðmundssonar seðlabankastjóra eftir fund stjórnskipunar- og eftirlitsnefndar um Samherjamálið og gjaldeyriseftirlit bankans.
Óskar Magnússon kemur nýr inn í stjórnina fyrir Jóhönnu á Bergi sem tekur sæti í varastjórn með Vilhjálmi Vilhjálmssyni. Stjórnina skipa nú:
- Baldvin Þorsteinsson
- Guðrún Blöndal
- Hrund Rudolfsdóttir
- Lárus L. Blöndal
- Óskar Magnússon
