Stjórn Bandalags háskólamanna hefur lýst yfir stuðningi við kjarabaráttu Læknafélags Íslands og Skurðlæknafélags Íslands. Segir hún mikilvægt að starfsaðstæður og laun heilbrigðisstarfsfólks, og annarra háskólamenntaðra sérfræðinga á Íslandi, verði samkeppnishæf við kjör sem bjóðist erlendis.
Stjórnin segir að annars séu líkur á frekari atgervisflótta sérfræðinga með tilheyrandi afturför fyrir íslenskt samfélag. Atgervisflóttinn sé samfélaginu dýrkeyptur þar sem fjárfesting í þekkingu fari forgörðum. Jafnframt tapist skatttekjur og undirstöður almannaþjónustu veikist.
Skorar stjórnin því á stjórnvöld að afstýra slíkri þróun með forgangsröðun í þágu þekkingar á vinnumarkaði.
