*

mánudagur, 6. apríl 2020
Erlent 15. febrúar 2020 19:55

Bandaríkin hækka tolla á Airbus-vélar

Ákvörðunin er svar við niðurgreiðslu Evrópusambandsins á rekstri Airbus, sem Bandaríkin segja skekkja samkeppni.

Ritstjórn
Airbus A320 vélarnar taka allt að 132 farþega og geta flogið allt að 7 þúsund kílómetra. Fyrsta A320 vélin leit dagsins ljós á 9. áratug síðustu aldar, og hátt í 10 þúsund eintök hafa síðan verið framleidd.

Bandarískir innflutningstollar á flugvélar – sem fyrst og fremst hafa áhrif á vélar evrópska framleiðandans Airbus – verða hækkaðir, samkvæmt yfirlýsingu þarlendra yfirvalda.

Ekki var hinsvegar ákveðið að hækka aðra tolla á evrópskar vörur, sem í dag standa í 25%, en einnig hafði verið til skoðunar að hækka.

Málið er nýjasta þróun í deilu Bandaríkjanna og Evrópusambandsins um opinberan stuðning við risana tvo í framleiðslu flugvéla, hið bandaríska Boeing – sem hefur átt erfitt uppdráttar vegna vandræða með 737 MAX vélar þess – og hið evrópska Airbus, sem Bandaríkin hafa gagnrýnt Evrópusambandið fyrir að niðurgreiða.

Donald Trump Bandaríkjaforseti er í frétt Financial Times um málið sagður hafa beint spjótum sínum í æ meira mæli að Evrópu í tollamálum eftir að vopnahlé náðist í tollastríðinu við Kína, og Bandaríkjaþing lagði blessun sína yfir samkomulag við nágrannaríkin til norðurs og suðurs, Kanada og Mexíkó, um að gera breytingar á fríverslunarsamningi ríkjanna þriggja: NAFTA.

Bandarískir embættismenn hafa ítrekað lýst yfir áhyggjum af vaxandi vöruskiptajöfnuði við Evrópusambandið, sem hefur vaxið um 22% úr 146 milljörðum dala árið 2016 í 178 milljarða í fyrra.

Stikkorð: Airbus