*

miðvikudagur, 17. júlí 2019
Innlent 31. mars 2019 11:01

Bankastjórar verði fjórir á næsta ári

Sameining FME og Seðlabanka tekur gildi um áramót og seðlabankastjórar verða fjórir samkvæmt nýframlögðum frumvörpum.

Ritstjórn
Haraldur Guðjónsson

Sameining Fjármálaeftirlitsins og Seðlabankans tekur gildi um áramót verði lagafrumvörp, sem Katrín Jakobsdóttir forsætisráðherra og Bjarni Benediktsson fjármála- og efnahagsráðherra lögðu fram á Alþingi í gær, að lögum. Samhliða því verður seðlabankastjórum fjölgað úr tveimur í fjóra.

Samkvæmt frumvörpunum verður einn seðlabankastjóri og þrír varaseðlabankastjórar. í dag eru seðlabankastjórar tveir, einn aðalseðlabankastjóri og einn aðstoðarseðlabankastjóri. Auk þess mun einn varaseðlabankstjóri koma í stað forstjóra Fjármálaeftirlitsins. Sá mun bera ábyrgð á fjármálaeftirliti en hinir tveir munu bera ábyrgð á fjármálastöðugleika annars vegar og peningastefnu hins vegar.

Forsætisráðherra mun skipa seðlabankastjóra og varaseðlabankastjóra til fimm ára í senn að hámarki tvívegis líkt og núgildandi lög segja til um. Þriggja manna nefnd skipuð af forsætisráðherra mun fjalla um hæfni umsækjenda og ráðherra mun að loknu matsferli skipa í embættin.

Í frumvörpunum er gert ráð fyrir að breytingar verði á stjórnkerfi Seðlabankans þannig að þrjár nefndir taki ákvarðanir um beitingu valdheimilda Seðlabankans, það verði peningastefnunefnd, fjármálastöðugleikanefnd og fjármálaeftirlitsnefnd. Peningastefnunefnd tekur ákvarðanir um beitingu stjórntækja bankans í peningamálum, fjármálastöðugleikanefnd metur kerfisáhættu og tekur ákvarðanir um beitingu stjórntækja sem varða fjármálastöðugleika og fjármálaeftirlitsnefnd sem tekur ákvarðanir sem varða fjármálaeftirlit samkvæmt frumvörpunum.

25 ára afmælistilboð VB – 50% afsláttur af áskrift

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti.
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir í 4 mánuði. Áskrifendur fá Viðskiptablaðið, Frjálsa verslun og Fiskifréttir sent ásamt vefaðgangi að vb.is og fiskifrettir.is