Ríkisendurskoðandi Suður Afríku hefur tilkynnt að öllum samningum við KPMG vegna endurskoðunar á reikningum opinberra stofnana í landinu hafi verið rift.
Ástæðan er tengsl fyrirtækisins við Gupta fjölskylduna, sem hefur verið ásökuð um að hafa í samvinnu við fyrrum forseta landsins, Jacob Zuma, dælt fjármagni og verkefnum til eigin fyrirtækja. Eins og Viðskiptablaðið greindi frá þurfti Zuma að segja af sér í febrúar eftir að varaforseti hans vann sigurorð á fyrrum eiginkonu hans í baráttu um leiðtogasæti Afríska þjóðarflokksins.
Sigraði eina af fyrrum eiginkonum Zuma
Hafði Cyril Ramaphosa, sem tekið hefur verið við sem forseti, gagnrýnt Zuma, fyrrum bandamann sinn í baráttunni gegn ríkisstjórn hvíta minnihlutann, vegna ítrekaðra spillingarmála í kosningabaráttunni, en Nkosazana Dlamini-Zuma sem var ein af mörgum fyrrverandi og núverandi eiginkonum Zuma var talin líkleg til að halda hlífiskildi yfir honum.
Litlu mátti þó muna á flokksþingi flokksins, sem hefur verið með tögl og haldir á stjórnkerfi landsins síðan árið 1994 þegar svartir íbúar landsins fengu að kjósa til jafns við aðra íbúa landsins, þegar aðskilnaðarstefnan í landinu var endanlega afnumin.
Ráku meðeigendur og báðust afsökunar
Aukin pressa hefur verið á KPMG, sem beðist hefur afsökunar á aðild sinni sem og nokkrir meðeigendur hafa yfirgefið fyrirtækið, síðustu vikur. Kom fyrirtækið aftur í hámæli eftir að VBS bankinn féll, þó fyrirtækið hefði skrifað upp á reikninga bankans fyrir síðasta ár.
Hefur KPMG sagt að meðeigendurnir tveir sem unnu að endurskoðun bankans hafi verið látnir fara eftir að í ljós kom að þeir hefðu ekki látið uppi um fjárhagsleg tengsl sín við bankann, að því er FT segir frá.
Fleiri fréttir frá Suður Afríku:
- 12. febrúar 2018 - Framtíð Zuma ráðin í dag
- 14. ágúst 2017 - Zuma vill refsa andstæðingum
- 28. mars 2017 - Randið veikist um 4%
- 29. apríl 2017 - Zuma berst gegn peningaþvætti
- 3. apríl 2017 - Lánshæfi Suður-Afríku í ruslflokk
- 22. febrúar 2017 - Setja á nýtt 45% skattþrep
- 12. ágúst 2017 - Suður Afríka á ný stærsta hagkerfið
- 21. nóvember 2016 - Suður-Afríka hyggst setja lágmarkslaun
- 6. ágúst 2016 - Jakob Zuma kennt um ófarir ANC
- 4. ágúst 2016 - Tök ANC á Suður Afríku að losna
- 41. mars 2016 - Forseti Suður-Afríku braut gegn stjórnarskrá