Héraðsdómur Reykjavíkur hafnaði í dag kröfu Baugs um áframhaldandi greiðslustöðvun. Þetta þýðir að Baugur verður að öllum líkindum tekinn til gjaldþrotaskipta.
Í úrskurði dómsins segir að ráðagerð Baugs, um að koma nýrri skipan á fjármál sín, sé ekki raunhæf. Þess vegna þjóni áframhaldandi greiðslustöðvun ekki tilgangi.
„Af gögnum málsins má ráða að skuldir sóknaraðila [Baugs] eru mjög háar og sjálfur heldur hann því fram að eignir hans hafi lækkað mikið síðustu misseri vegna ástandsins á fjármálamörkuðum heimsins," segir í úrskurði dómsins. Þá hafi dótturfélag sóknaraðila í Bretlandi verið tekið úr höndum hans og sett undir stjórn manna á vegum yfirvalda.
Með greiðslustöðvuninni hafi Baugur viljað bíða um sinn og verja eignir sínar í von um að úr muni rætast á fjármálamörkuðum. Þá hafi Baugur talið nauðsynlegt fyrir sig að hefja nauðasamningsumleitanir.
„Hvorugt þessara atriða er til þess fallið að koma nýrri skipan á fjármál sóknaraðila, en í henni hlýtur að felast ráðagerð um að halda áfram starfsemi á nýjum grundvelli. Hið fyrra felur í raun í sér að bíða eftir betri tíð án þess og nokkuð sé hægt að segja til um hvenær hennar sé að vænta," segir m.a. í úrskurðinum.
Úrskurðinn í heild má finna hér.