Nokkra augljósa veikleika er að finna í fjárlagafrumvarpi ársins 2011 samkvæmt athugun Samtaka atvinnulífsins (SA). Samtökin telja að líkur séu á að tekjur ríkissjóðs verði allt að 30 milljörðum króna lægri en gert er ráð fyrir. Markmið efnahagsáætlunar stjórnvalda og Alþjóðagjaldeyrissjóðsins (AGS) um jákvæðan rekstur ríkisins yrðu þá að engu.
Í frumvarpi til fjárlaga ársins 2011 eru heildartekjur ríkissjóðs áætlaðar 477,4 milljarðar króna á næsta ári og heildargjöld áætluð 513,8 milljarðar króna. Halli á ríkissjóði er því áætlaður 36,4 milljarðar króna, eða 2,1% af landsframleiðslu.
Samtök atvinnulífsins telja að augljósir veikleika sé að finna í frumvarpinu.
Líkur á minni hagvexti
„Spáð er 3,2% hagvexti árið 2011 líkt og gert er ráð fyrir í þjóðhagsspá Hagstofunnar frá í júní sl. Í ágúst spáði Seðlabankinn um 2,4% hagvexti. Frá þeim tíma hefur orðið ennfrekari seinkun á fjárfrekum framkvæmdum. Samdráttur í opinberum framkvæmdum dregur enn úr hagvexti. Því eru líkur á óverulegum hagvexti næsta ári. Gangi það eftir leiðir það beint til 10-15 ma.kr. minni tekna ríkissjóðs,“ segir á vef Samtaka atvinnulífsins.
Skatttekjur ofmetnar
„Það vekur undrun að skatti á fjármagnstekjur og tekjuskatti fyrirtækja er ætlað að skila 7 ma.kr. eða 17% hærri fjárhæð á næsta ári þrátt fyrir lækkandi verðbólgu og mikið uppsafnað tap fyrirtækja.“
Engar launahækkanir óraunhæft
„Í frumvarpinu er talið til sparnaðar að engar hækkanir verði á launum og bótum almannatrygginga. Sú forsenda er ekki raunhæf. Miðað við 2,5% almenna hækkun launa og bóta munu útgjöld ríkissjóðs hækka um 4,5-5 ma.kr., brúttó , eða um 3 ma.kr. nettó.“
Sparnaður í rekstri skólakerfisins og heilbrigðiskerfisins lítt útfærður
„Fyrirhugaður sparnaður í rekstri skólakerfisins og heilbrigðiskerfisins er lítt eða ekkert útfærður og hefur m.a. komið stjórnendum heilbrigðisstofnana úti á landi í opna skjöldu. Sparnaður í skólakerfinu næst ekki fyrr en við upphaf næsta skólaárs sem hefst 1. ágúst nk. Lauslega má áætla að veikleiki í sparnaði stofnana þessara ráðuneyta sé á bilinu 2,5-3 ma.kr.“
Óvíst að sparnaður náist
„ Af öðrum stórum útgjaldaliðum sem erfitt hefur reynst að lækka sem einhverju nemur má nefna vaxtabætur, barnabætur og framlag til fæðingarorlofs. Samtals er gert ráð fyrir um 4 ma.kr. sparnaði á þessum liðum sem óvíst er að náist.“
Veikleikar metnir á 20-30 milljarða króna
Samkvæmt ofangreindum athugasendum Samtaka atvinnulífsins telja samtökin að veikleikar frumvarpsins séu a.m.k. á bilinu 20-30 milljarðar króna. Þeir geri markmið efnahagsáætlunar ríkisstjórnar og AGS að engu.
Í frétt SA segir að til viðbótar sé sá veikleiki í frumvarpinu að engir fjármunir séu ætlaðir til að draga úr eða sporna við áframhaldandi hallarekstri lífeyrissjóða opinberra starfsmanna. Segir að skuldbindingar ríkissjóðs séu ávísun á skattahækkanir í framtíðinni.
„Loks er vakin athygli á því að ekki er gert ráð fyrir neinni aukningu ríkisútgjalda fram til ársins 2014. Eigi það að standast þarf að auka afköst ríkisrekstursins með endurskipulagningu, þ.m.t. mennta-, heilbrigðis-, félagsmála- og dómskerfið. Af frumvarpinu má ráða að lítið sé farið af stað í þeirri vinnu. “
Frétt Samtaka atvinnulífsins má lesa hér
