Steingrímur Birgisson forstjóri Hölds/Bílaleigu Akureyrar telur offjárfestingu hafa átt sér stað í bílaleigubílum hér á landi í sumar. Þar sé líklega um að kenna óraunhæfum væntingum um fjölda ferðamanna að því er segir í Morgunblaðinu í dag.

„Þessi fjöldi bílaleigubíla, sem er núna 26 þúsund, þýðir bara að menn hafa offjárfest,“ segir Steingrímur sem vísar í að inní tölum um fjölgun ferðamanna séu einnig farþegar sem aldrei komi inn í landið heldur haldi áfram yfir hafið.

„Maður heyrir það núna, það er minnkun á Vestfjörðum, minnkun á Austfjörðum og miðað við þær upplýsingar sem ég hef þá standa hlutirnir í stað á Akureyri. Þetta eru bara rauntölur.“

Steingrímur telur að komandi vetur verði mörgum bílaleigum erfiður. „Þessi fjöldi bílaleigubíla sem er núna er of mikill miðað við eftirspurn.“