Í janúar voru 838 fólks- og sendibílar nýskráðir hér á landi, rúmum 14% færri en í fyrra. Af þeim voru 280 af merkjum frá bílaumboðinu BL og var markaðshlutdeild félagsins 33,4% á markaðnum í heild að því er fram kemur í tilkynningu frá félaginu.
Bílaleigur landsins nýskráðu 197 bíla í janúar, 27,3% færri en í janúar í fyrra þegar þeir voru 271. Af heildarfjöldanum fóru 96 fólks- og sendibílar frá BL til leiganna, þar af 48 frá Hyundai. Söluhæsta einstaka bílgerðin sem bílaleigurnar nýskráðu í janúar var af gerðinni Hyundai i10, alls fjörutíu bílar. Það sem af er ári er hlutdeild BL á bílaleigumarkaði 48,7%.
Hyundai söluhæstur merkja félagsins
Af einstökum merkjum var Hyundai söluhæsta merki BL í janúar með alls 91 nýskráningu. Renault var í öðru sæti með 54 sölur og Nissan í því þriðja með 50 bíla. Renault, Nissan og Hyundai komust jafnframt á „topp tíu“ lista mánaðarins á innanlandsmarkaði, þar sem BL náði góðum árangri á öllum helstu kaupendamörkuðunum.
Þannig nam hlutdeild fyrirtækisins 26,2% á einstaklingsmarkaði, þar sem Hyundai Kona var vinsælasta merki BL. Á fyrirtækjamarkaði nam hlutdeild BL 32,5% í janúar, en þau keyptu meðal annars 50 fólksbíla frá BL, aðallega Hyundai, Renault, Land Rover, BMW og Nissan. Þá voru Nissan e-NV200 og Renault Trafic jafnframt söluhæstir á markaði lítilla og meðalstórra sendibíla.
Á lúxusbílamarkaði voru 134 bílar nýskráðir í janúar, þar af 43 frá BMW Group, Jaguar og Land Rover. Af merkjum BL var BMW söluhæstur með átján nýskráningar. Hlutdeild BL á lúxusbílamarkaði var rúmlega 32% í janúar.
99 bílanna búnir rafmótor
Af heildarnýskráningum BL í janúar voru 99 bílar búnir rafmótor. Nýskráðir voru 67 rafbílar, 14 Nissan Leaf, 12 e-NV200 sendibílar, 21 Hyundai Kona og Ioniq auk 20 rafbíla frá Renault, Jaguar, BMW og MINI. Þá voru einnig nýskráðir 24 tengiltvinnbílar, 10 BMW auk 8 Hyundai og 6 Land Rover, auk átta tvinnbíla frá Subaru og Range Rover.
Þegar litið er til nýskráninga grænna bíla á markaðnum í heild í janúar kemur í ljós að einstaklingar keyptu langflesta rafbílana sem nýskráðir voru enda litu 61,4% þeirra sem keyptu bíl í janúar fram hjá hinu hefðbundna jarðefnaeldsneyti. Hlutdeild raf- og tengiltvinnbíla í heildarsölu fólks- og sendibíla BL í janúar var 32,9%.
