Nú hefur Bill and Melinda Gates Foundation, sem eru ein stærstu góðgerðasamtök í heiminum, selt hluti sína í olíufyrirtækinu BP. Samtökin voru stofnuð og eru rekin af Bill Gates og eiginkonu hans, Melinda, en Bill er þekktur fyrir að hafa stofnað tölvufyrirtækið Microsoft. Guardian segir frá þessu.
Stofnunin, sem hefur varið fleiri milljörðum Bandaríkjadala í að bæta lífskjör fólks og aðgengi að heilbrigðisþjónustu víðsvegar um heim, seldi 187 milljóna dala hlut sinn - sem eru 22,6 milljarðar íslenskra króna - síðasta haust, samkvæmt skýrslu fyrirtækisins til verðbréfaeftirlits Bandaríkjanna.
Þá hefur stofnunin þegar losað sig við 824 milljóna Bandaríkjadala hlut sinn í ExxonMobil. Það eru rúmlega 100 milljarðar íslenskra króna. Góðgerðasamtökin eiga þó enn samtals ríflega 40 milljarða Bandaríkjadala í öðrum olíufélögum. Náttúruverndarsamtök og hreyfingar andsnúnar olíuvinnslu hafa skorað á hana að selja hluti sína í olíuvinnslufyrirtækjum.
