*

miðvikudagur, 20. nóvember 2019
Fólk 28. maí 2019 09:26

Birgir Jónsson nýr forstjóri póstsins

Íslandspóstur hefur ráðið Birgi Jónsson, fyrrum framkvæmdastjóra Póstmiðstöðvarinnar, sem forstjóra.

Ritstjórn
Birgir Jónsson starfaði áður sem framkvæmdastjóri Póstmiðstöðvarinnar og þar áður hjá Advania.
Birgir Ísl. Gunnarsson

Birgir Jónsson hefur verið ráðinn nýr forstjóri Íslandspósts og hefur þegar tekið til starfa. Kemur ráðningin á sama tíma og Póst- og fjarskiptastofnun hefur samþykkt að fyrirtækið fái um 1,5 milljarð króna.

Birgir hefur langa stjórnunar- og rekstrarreynslu í atvinnulífinu hér heima og erlendis, síðast sem framkvæmdastjóri Póstmiðstöðvarinnar en þar á undan var hann forstöðumaður mannauðslausna hjá Advania.

Þá muna margir eftir Birgi sem fyrrverandi trommuleikara þungarokkshljómsveitarinnar Dimmu. Birgir lærði prentun hér heima, lauk BA-gráðu í prent- og útgáfustjórnun frá London Institute og MBA-prófi frá Westminster University í London.

„Ég er þakklátur fyrir það mikla traust sem stjórn Íslandspósts sýnir mér,“ segir Birgir Jónsson. „Það er mikið ábyrgðarhlutverk að leiða Íslandspóst sem þjónar mikilvægum almannahagsmunum. Ljóst er að stór og krefjandi verkefni bíða. Ég hlakka til að takast á við þau og vinna með því góða fólki sem starfar hjá Íslandspósti um land allt.“

Bjarni Jónsson formaður stjórnar Íslandspósts: „Með ráðningu Birgis fær Íslandspóstur öflugan stjórnanda sem við treystum fullkomlega til að takast á við þau fjölmörgu verkefni sem bíða og leiða þann fjölbreytta hóp sem hjá fyrirtækinu starfar.”