*

fimmtudagur, 15. apríl 2021
Fólk 25. mars 2021 09:34

Birkir tekur við af Valgeiri hjá VÍS

Birkir Jóhannsson mun hefja störf sem framkvæmdastjóri kjarnastarfsemi VÍS þann 1. júní næstkomandi.

Ritstjórn
Aðsend mynd

Birkir Jóhannsson hefur verið ráðinn framkvæmdastjóri kjarnastarfsemi hjá VÍS. Hann tekur við af Valgeiri M. Baldurssyni sem lét af störfum nýlega til að taka við sem forstjóri Terra. Birkir hefur formlega störf hjá félaginu þann 1. júní næstkomandi. Þetta kemur fram í tilkynningu VÍS til Kauphallarinnar. 

Birkir mun sitja í framkvæmdastjórn félagsins og taka þannig þátt í stefnumótun þess. Hann mun bera ábyrgð á fjármálastjórn félagsins og að reksturinn sé í takt við áætlanir og markmið sem sett eru af stjórn og framkvæmdastjórn. Framkvæmdastjóri kjarnastarfsemi ber einnig ábyrgð á því að hafa yfirsýn yfir áhættu vátrygginga hjá félaginu ─ og að sett séu markmið og mælikvarðar í tengslum við ábyrgan vátryggingarekstur. Þá ber hann ábyrgð á rekstri tjónadeilda félagsins. Auk þess mun Birkir sitja í fjárfestingaráði félagsins.  

„Ég er stoltur af því að hefja störf hjá VÍS, sem ég tel vera framsæknasta tryggingafélagið á markaðnum. Framtíðarsýnin er að verða stafrænt þjónustufyrirtæki sem breytir því hvernig tryggingar virka. Mér finnst þetta metnaðarfull og spennandi framtíðarsýn og ég er fullur tilhlökkunar að leggja mitt á vogarskálarnar til þess að hún verði að veruleika,“ er haft eftir Birki Jóhannssyni, framkvæmdastjóra kjarnastarfsemi VÍS. 

Birkir hefur yfir 15 ára reynslu á fjármálamörkuðum. Nú síðast starfaði hann hjá Birti Capital Partners, þar sem hann hefur verið meðeigandi, en fyrirtækið sinnir fjármálaráðgjöf. Birkir starfaði í fimm ár sem framkvæmdastjóri fjármála, reksturs og þróunar hjá Valitor. Áður starfaði Birkir meðal annars í fyrirtækjaráðgjöf Arion banka og hjá Lögmönnum Höfðabakka.

Birkir er með embættispróf í lögfræði frá Háskóla Íslands og meistaragráðu í fjármálum fyrirtækja frá Háskólanum í Reykjavík. Auk þess hefur Birkir lokið prófi í verðbréfaviðskiptum og hefur réttindi sem héraðsdómslögmaður.

„Á sama tíma og ég þakka Valgeiri kærlega fyrir hans hlut í uppbyggingu félagsins ─ sem og einkar ánægjulegt samstarf undanfarin ár ─ þá gleðst ég yfir því að fá Birki í okkar góða hóp. Ég hef miklar væntingar til Birkis og er þess fullviss að hann standi fullkomlega undir þeim. Víðtæk reynsla hans og menntun á eftir styrkja stjórnendahópinn enn frekar. Framundan eru spennandi verkefni hjá félaginu og ég hlakka til samstarfsins,“ segir Helgi Bjarnason, forstjóri VÍS. 

Stikkorð: VÍS Birkir Jóhannsson