Íslandsbanki hefur sent frá sér tilkynningu, þar sem bent er á að Birna Einarsdóttir bankastjóri hafi í nóvember síðastliðnum lækkað í launum. Kemur tilkynningin í kjölfar fregna af launahækkun Lilju B. Einarsdóttur, bankastjóra Landsbankans. Þess má geta að Íslandsbanki mun birta uppgjör fyrir fjórða ársfjórðung síðasta árs og árið 2018 í heild á miðvikudaginn.
„Í ljósi umræðunnar síðustu daga er rétt að taka fram að í nóvember sl. var tekin ákvörðun að frumkvæði bankastjóra að lækka laun hans um 14,1% sem samþykkt var af stjórn bankans," segir í tilkynningu frá Íslandsbanka. „Heildarlaun bankastjóra Íslandsbanka hafa hækkað um 4,6% síðastliðin tvö ár en á sama tíma hefur launavísitala hækkað um 13.2%. Ákvörðunin var tekin í ljósi stöðunnar í íslensku atvinnulífi og kjaraviðræðna sem standa yfir. Jafnframt skal tekið fram að laun bankastjóra og framkvæmdastjóra munu ekki hækka árið 2019 né taka samningsbundnum hækkunum ef til þeirra kemur."
Launahækkun Lilju, bankastjóra Landsbankans, hefur verið gagnrýnd og fyrr í kvöld barst tilkynning frá bankanum vegna hennar. Í tilkynningunni sagði meðal annars bankaráð væri „meðvitað um að kjör bankastjóra eru vissulega góð en þau eru í samræmi við starfskjarastefnu bankans, sem hluthafar hafa samþykkt, um að starfskjör eigi að vera samkeppnishæf en þó ekki leiðandi."
