Gengi Bitcoin hefur nærri tvöfaldast það sem af er ári. Þar spilar meðal annars inn í stuðningur Elon Musk, stofnanda Tesla, við rafmyntina. Hún hefur þó sveiflast mikið eftir að Musk tístaði á laugardaginn að hún virtist hátt verðlögð.

Rafmyntin lækkaði um meira en 16% og fór undir 50.000 dali í New York á örfáum klukkustundum eftir tíst Musk á laugardaginn, að því er segir í frétt Bloomberg . Hún náði sér þó snögglega aftur á strik og var nálægt því að fara yfir 59.000 dali á sunnudaginn. Gengi Bitcoin lækkaði aftur um rúm 10% í dag.

Viðmælandi Bloomberg telur að verðsveiflurnar yfir helgina skýrist af viðskiptum áhugafjárfesta. Fyrir vikið gæti lækkunin í dag skýrst af viðbrögðum stærri rafmyntafjárfesta, sem fylgja hefðbundnum vinnutímum, við tíst Musk.

Bitcoin hækkaði um 17% í lok janúar þegar Musk breytti persónulegri lýsingu (e. bio) sinni á Twitter í #bitcoin í lok janúar. Rafmyntin hefur hækkað verulega síðan þá, sérstaklega eftir að rafbílaframleiðandinn Tesla tilkynnti að hann hefði fjárfest fyrir 1,5 milljarð dala í Bitcoin og hygðist byrja að taka við greiðslu fyrir bíla sína í rafmyntinni í náinni framtíð.