Bjarni Benediktsson, fjármála- og efnahagsráðherra, segir það ekki koma sér á óvart að kjarasamningur við hjúkrunarfræðinga skyldi hafa fallið í atkvæðagreiðslu félagsmanna, þar sem enginn hafi talað fyrir samningnum. Þetta segir hann í samtali við mbl.is .
Greint var frá því upp úr hádegi að samningurinn hefði verið felldur með rúmum 88% greiddra atkvæða. Bjarni segir greinilegt að hugur hafi ekki fylgt máli þegar skrifað var undir samninginn.
Ólafur G. Skúlason, formaður Félags íslenskra hjúkrunarfræðinga, hefur gefið út að látið verði reyna á lögmæti þess að skipa gerðardóm í deilunni fyrir dómstólum. Bjarni segir hins vegar alveg skýrt að málið gangi nú til gerðardóms.
„Mín afstaða byggir á því sem var vilji og ætlun löggjafans. Þetta er óskaplega einfalt. Það voru sett lög á verkfallsaðgerðir og fært í hendur gerðardóms að ákveða kjörin ef ekki næðust samningar. Nú liggur fyrir að ekki tókust samningar og þá er alveg skýrt í mínum huga að málið gengur til gerðardóms,“ segir Bjarni í samtali við mbl.is.