*

sunnudagur, 20. október 2019
Innlent 17. september 2019 12:00

Bjarni Ben furðar sig á dýrum kranabjór

Fjármálaráðherra Bjarni Benediktsson keypti hálfslíters kranabjór á 1.400 krónur og spyr um álagningu.

Ritstjórn
Bjarni Benediktsson fjármálaráðherra kynnti fjárlagafrumvarp 2020 á dögunum en í því er lagt til að áfengisgjald verði hækkað.
Eyþór Árnason

„Á Nordica hátelinu keypti ég hálfslíters Tuborg Classic um helgina. Hann kostar í ÁTVR, með smásöluálagningunni, 379 kr. samkvæmt vefsíðunni. Sami bjór af krana kostaði 1.400 kr. á hótelinu. Það er 370% yfir smásöluverði ÁTVR. Konan sem afgreiddi mig samsinnti um að þetta væri hátt verð, en taldi það þó ekki það hæsta í borginni,“ þannig skrifar Bjarni Benediktsson fjármálaráðherra á Facebook síðu sinni núna í morgun. 

Með færslunni er tengill á frétt Viðskiptablaðsins um gagnrýni Félags atvinnurekenda á fyrirhugaða hækkun áfengisgjalds. „Menn segja skatta skýra hátt áfengisverð. Því verður ekki mótmælt að áfengisgjöld eru há á Íslandi. Maður spyr sig samt sem áður hvort hér komi ekki fleira til,“ skrifar Bjarni enn fremur. 

„Það er ástæða til að fylgjast vel með verðþróun í landinu, m.a. Vegna mikilvægis þess fyrir ferðaþjónustuna að geta boðið samkeppnishæf verð. Allir þættir verða að vera teknir með í þeirri umræðu, ekki eingöngu opinber gjöld, en þau rýrna að raungildi þessi misserin (áfengisgjald fylgir ekki verðlagi),“ skrifar Bjarni í niðurlagi færslunnar.