*

sunnudagur, 20. júní 2021
Erlent 6. apríl 2021 19:04

Björgólfur sígur niður Forbes listann

Þrátt fyrir að auðæfi hans hafi aukist um 10% fellur hann úr sæti 1.063 niður í sæti 1.444. Davíð Helgason nýr á listanum.

Ritstjórn
Björgólfur Thor Björgólfsson.
Aðsend mynd

Hinn árlegi milljarðamæringa listi Forbes tímaritsins inniheldur 2.755 milljarðamæringa, 660 fleiri en í fyrra, og hafa þeir aldrei verið fleiri. Sumum gæti þótt það athyglisvert í ljósi þess að á því tímabili sem listinn nær yfir (apríl 2020-mars 2021) tröllreið heimsfaraldur lífi fólks, en líkt og þekkt er hafa til að mynda hlutabréfamarkaðir farið með himinskautum eftir að hafa tekið dýfu á fyrstu vikum faraldursins er óvissan var hvað mest.

Af þessum 660 nýju meðlimum listans eru 493 í fyrsta sinn á listanum og 86% þeirra sem rata á listann eru ríkari en fyrir ári síðan.

Fjórða árið í röð situr Jeff Bezos, forstjóri og stofnandi Amazon, á toppi listans. Eru auðæfi hans metin á hvorki meira né minna en 177 milljarða dala. Teslu forstjórinn skrautlegi, Elon Musk, er svo í öðru sæti en auðæfi hans eru metin á 151 milljarð dala.

Samanlögð auðæfi milljarðamæringanna 2.755 nemur um 13 þúsund milljörðum dala, en í fyrra námu samanlögð auðæfi 8 þúsund milljörðum dala.

Líkt og undanfarin ár er Íslendingurinn Björgólfur Thor Björgólfsson á milljarðamæringalistanum en hann metinn er á 2,2 milljarða dala og situr í sæti númer 1.444. Í fyrra sat hann í sæti númer 1.063 en þá voru eignir hans metnar á um 2 milljarða dala.

Davíð Helgason, einn stofnenda Unity, er á meðal nýliða á listanum. Líkt og Viðskiptablaðið hefur áður fjallað um hafa auðæfi hans vaxið verulega í kjölfar skráningar Unity á hlutabréfamarkað. Metur Forbes verðmæti eigna hans á 1 milljarð dala og situr hann í 2.674. sæti listans.

Tíu ríkustu auðjöfrar heims samkvæmt 2021 Forbes listanum eru eftirfarandi:

  • 1.       Jeff Bezos, 177 milljarðar dala
  • 2.       Elon Musk, 151 milljarðar dala
  • 3.       Bernard arnault og fjölskylda, 150 milljarðar dala
  • 4.       Bill Gates, 124 milljarðar dala
  • 5.       Mark Zuckerberg, 97 milljarðar dala
  • 6.       Warren Buffett, 96 milljarðar dala
  • 7.       Larry Ellison, 93 milljarðar dala
  • 8.       Larry Page, 91,5 milljarðar dala
  • 9.       Sergey Brin, 89 milljarðar dala
  • 10.   Mukesh Ambani, 84,5 milljarðar dala