Novator, fjárfestingafélag Björgólfs Thors Björgólfssonar, fær 42 milljarða í tengslum við arðgreiðslur frá fjarskiptafélaginu WOM í Chile og sölu hlutafjár í pólska fjarskiptafélaginu Play.
Þá hyggst Novator koma á fót fjarskiptafélagi í Kólumbíu. Novator vann útboð í desember um úthlutun á vissum tíðnisviðum á farsímaneti í Kólumbíu. Novator greiðir 257 milljónir dollara, um 32 milljarða króna, og þarf að sjá fyrir fjarskiptasambandi á 674 stöðum í landinu, sem á að mynda grunn að stofnun félagsins. Kólumbískir fjölmiðlar telja sig hafa heimildir fyrir því að Novator hafi einnig sýnt áhuga á að kaupa kólumbíska hluta fjarskiptafélagsins Telefónica að fullu eða að hluta.
Sjá einnig: Björgólfur fær 30 milljarða í arð
WOM gekk frá fjármögnun á 250 milljóna dollara, um 30 milljarða króna, arðgreiðslu til Novator í desember. Þá seldi Novator ríflega 4% hlut í pólska fjarskiptafélaginu Play fyrir um 12 milljarða króna í september.
Nánar er fjallað um málið í Viðskiptablaðinu sem kom út í dag. Áskrifendur geta nálgast pdf-útgáfu af blaðinu með því að smella á hlekkinn Tölublöð .
