Með sölunni á Actavis hefur Björgólfur Thor Björgólfsson, athafnamaður og fjárfestir, stigið stórt skref í skuldauppgjöri sínu við kröfuhafa. Sem kunnugt er var í síðustu viku gengið frá kaupum bandaríska lyfjafyrirtækisins Watson á Actavis fyrir 4,25 milljarða evra, eða um 700 milljarða króna.
Stærsti hluti þess fjármagns rennur til helsta kröfuhafa Björgólfs Thors, þýska bankans Deutsche Bank. Þá fær Björgólfur Thor stóran hlut í Watson sem hann hyggst eiga um sinn. Salan er háð samþykki samkeppnisyfirvalda í Bandaríkjunum en ef fer sem horfir tekur Watson við félaginu í árslok.
Björgólfur Thor segist í samtali við Viðskiptablaðið vera ánægður með söluna. Hún sé í takt við væntingar hans og samlegðaráhrif Actavis og Watson séu mikil.
Aðspurður um stöðuna á skuldauppgjöri sínu segist Björgólfur Thor hafa gert upp tæpan helming skulda sinna með sölunni á Actavis. Deutche Bank tók þátt í því að lána félögum í eigu Björgólfs Thors um 4,1 milljarð evra til að kaupa upp öll hlutabréf í Actavis vorið 2007.
Fjallað er um skuldauppgjör Björgólfs Thors í Viðskiptablaðinu sem kemur út í dag. Þá rifjar blaðið upp kaup Björgólfs Thors á Actavis sumarið 2007, sem voru stærstu viðskipti íslandssögunnar. Áskrifendur geta nálgast blaðið undir liðnum tölublöð hér að ofan.
