Björgólfur Thor Björgólfsson er í ítarlegu viðtali við Financial Times í dag.
Í viðtalinu segir hann að bók sín, „Billions to Bust – and Back", sé stór minnismiði um að láta hlutina ekki fara úr böndunum, aftur. Talsvert er fjallað um bókina í viðtalinu.
Fram kemur að Björgólfur hafi selt allar helstu lúxuseignir sínar; einkaþotuna, snekkjuna, og öll hlutabréf sem hann gat selt. Hins vegar segist hann hafa haldið hlutum í lyfjafyrirtækinu Actavis, símafélaginu Play og átt áfram„gamlan” Aston Martin sportbíl.
Björgólfur segist sjá tækifæri í Rússlandi og muni hugsanlega snúa þangað aftur. Fall rúbblunnar og krísan í Úkraínu gerir Rússland tilvalinn stað samkvæmt kokkabók Björgólfs, að eigin sögn.
Hann segir að bestu samningarnir verði til þegar fjárfest sé í „löskuðum fyrirtækjum í stöðugum ríkjum eða stöndugum fyrirtækjum í löskuðum ríkjum”.
