Viðskiptablaðið hefur áður greint frá bílahlunnindum stjórnenda og starfsmanna hjá Isavia. Alls hafa átta starfsmenn fyrirtækisinsins bifreið til umráða og nam kostnaður við þá 2,6 milljónum króna á síðasta ári. Björn Óli Hauksson, forstjóri Isavia, segir kostnaðinn reiknaðan út eftir reglum skattstjóra.
„Starfsmennirnir hafa flestir þessa bíla í takmörkuðum umráðum, þ.e. til að komast á milli heimilis og vinnu, og við vitum hver sú vegalengd er. Þá er fylgst með því reglulega að bíllinn sé ekki notaður í annað en þessi afnot með því að skoða kílómetramæli. Eins er settur rammi utan um afnot bíla sem eru í ótakmörkuðum afnotum, enda eru bílarnir ekki hugsaðir til ferðalaga. Þá verð ég að benda á að við höfum ekki verið að byggja hér upp flota dýrra glæsibifreiða fyrir framkvæmdastjóra,“ segir Björn Óli í samtali við Viðskiptablaðið.
Hann segir fæsta framkvæmdastjóra félagsins hafa bíl til afnota.
„Bílarnir eru hugsaðir fyrir þá starfsmenn sem búsettir eru flestir í Keflavík og þurfa starfs síns vegna að koma oft en óreglulega til Reykjavíkur. Í flestum tilvikum er um að ræða fólk sem þarf stundum að hefja vinnudaginn í Reykjavík og stundum í Keflavík og því heppilegra að viðkomandi hafi bíl til umráða til slíkra ferða. Ef ferðirnar eru stopulli þá keyra menn á sinn vinnustað og taka svo vinnubíl til að fara á milli staða. Þeir framkvæmdastjórar sem eru með sína starfsstöð í Reykjavík eru ekki í þessu bílakerfi. Þetta utanumhald í bílamálum er allt hugsað til að hafa reksturinn sem hagkvæmastan og nýta tíma starfsmanna sem best og er í sífelldri endurskoðun.“
Ítarlegt viðtal við Björn Óla má finna í Viðskiptablaðinu sem kom út síðasta fimmtudag. Áskrifendur geta nálgast pdf-útgáfu af blaðinu með því að smella á hlekkinn Tölublöð .
