Héraðsdómur Reykjavíkur hefur sýknað Björn Steinbekk af kröfu GAM Management ráðgjafar ehf. um endurgreiðslu 686 þúsund króna auk dráttarvaxta.
Krafan er vegna miða á leik Íslands og Frakklands á EM í Frakklandi í sumar sem voru ekki afhentir.
Að mati héraðsdóms kom Björn ekki fram fyrri eigin hönd heldur Sónar Reykjavík ehf. Valt niðurstaðan m.a. á því að í tölvupóstum um kaupin kom fram „Bjorn Steinbekk, Head Promoter“ og að GAM Management ráðgjöf greiddi inn á reikning Sónar Reykjavík.
í niðurstöðu héraðsdóms segir. „Samkvæmt öllu framangreindu telur dómurinn nægilega sannað að viðsemjanda stefnda mátti vera ljóst að kaupsamningur væri gerður við stefnda fyrir hönd Sónar Reykjavík ehf. Verður því að leggja til grundvallar að téð einkahlutafélag hafi verið seljandi miðanna og ábyrgt fyrir efndum kaupsamningsins.“
Málið var upphaflega einnig höfðað gegn Sónar Reykjavík ehf. en ekki var sótt þing af hálfu félagsins. Það hefur nú verið tekið til gjaldþrotaskipta.