Tekjur Bláa lónsins hf. námu 6.176 milljónum króna í fyrra. Hagnaður eftir skatta nam 1.802 milljónum. Þetta kemur fram í afkomutilkynningu frá félaginu.
EBITDA var 2.646 milljónir króna, eða 42,8% af veltu. Eiginfjárhlutfall nam 36% og handbært fé frá rekstri var 2.407 milljónir króna. Eignir félagsins voru í árslok metnar á 7.273 milljónir króna.
Aðalfundur félagsins, sem var haldinn fyrr í dag, samþykkti arðgreiðslu til hluthafa sem nemur 1.191 milljónum króna.
Í takt við aukinn ferðamannastraum
„ Vöxtur Bláa Lónsins undanfarin ár hefur verið í takt við þróun ferðaþjónustunnar sem í dag aflar þjóðinni meiri gjaldeyristekna en nokkur önnur atvinnugrein. Nýtt met var sett í fjölda heimsókna í Bláa Lónið árið 2014 en þær voru 766 þúsund talsins. Sumarið 2014 störfuðu 364 manns hjá Bláa Lóninu," segir Grímur Sæmundsson, forstjóri Bláa lónsins í tilkynningu.
„Nú er unnið að áframhaldandi uppbyggingu sem felst í stækkun á upplifunarsvæði Bláa Lónsins og byggingu lúxushótels þar sem áherslan verður áfram á einstaka upplifun gesta og gæði," segir hann jafnframt.
