*

laugardagur, 27. nóvember 2021
Fólk 25. ágúst 2021 16:26

Blábankinn ræður nýjan bankastjóra

Stjórn Blábankans hefur ráðið Birtu Bjargardóttur sem næsta bankastjóra Blábankans á Þingeyri.

Ritstjórn
Aðsend mynd

Stjórn Blábankans hefur ráðið Birtu Bjargardóttur sem næsta bankastjóra Blábankans á Þingeyri. Greint er frá ráðningu Birtu í fréttatilkynningu.

„Birta hefur fjölbreytta reynslu af verkefnastjórnun, viðburðastjórnun og upplýsingamiðlun.Hún hefur meðal annars starfað með umhverfissamtökum, sem forstöðumaður upplýsingadeildar hjá Náttúrufræðistofnun Íslands, sérfræðingur hjá Warner Bros í London,markþjálfi, sérfræðingur fyrir Breska utanríkisráðuneytið og hefur stofnað og rekið eigið fyrirtæki á sviði heilsumarkþjálfunar. Birta er með BSc gráðu í dýrafræði og mastersgráðu í vísinda- og menningarmiðlun,“ segir í tilkynningu.

„Ég er afskaplega ánægð að hafa verið ráðin bankastjóri Blábankans og er virkilega spennt fyrir starfinu! Blábankinn er frábær vettvangur fyrir nýsköpun og sjálfbærni og ég hlakka til að þróa starf Blábankans áfram og sjá það blómstra enn frekar. Þetta er spurning um samstarf og samtal og eitt það fyrsta sem ég stefni á að gera er að hitta sem flesta á svæðinu - og læra nöfn allra íbúa Þingeyrar fyrir jól!,“ er haft eftir nýja bankastjóranum.

„Það er mikill fengur fyrir okkur að fá Birtu til að stýra Blábankanum og fylgja eftir því góða starfi sem þar hefur verið unnið. Blábankinn er nú þegar orðinn fyrirmynd fyrirsamfélags- og nýsköpunarmiðstöðvar annars staðar á landinu og það hefur sýnt sig að samstarf ríkis, sveitarfélags og einkaaðila virkar vel í svona starfi. Við viljum vaxa enn frekar og bjóðum hugmyndaríku fólki að koma til Þingeyrar," er haft eftir Katli Berg Magnússyni, stjórnarformanni Blábankans.