„Egill Jóhannsson situr á skrifstofu sinni í Reykjavík, horfir á snæviþakta Esjuna og athugar stöðuna á gengi íslensku krónunnar á fimmtán mínútna fresti. Hann er ekki gjaldeyrismiðlari; hann er bílasali”.
Þannig hefst umfjöllun Bloomberg-fréttaveitunnar um íslensku krónuna og þau áhrif sem veiking hennar hefur fyrir íslenskt efnahagslíf.
Íslenska krónan hefur fallið í verði um 20% gagnvart evrunni það sem af er þessu ári. Af þeim sökum segist Egill, framkvæmdastjóri Brimborg, hafa þurft að hækka verðið á bílum um allt að 12%.
„Ég myndi fremur vilja eyða tíma mínum í að selja bíla. [...] En þetta er Ísland í dag. Það snýst allt um gjaldmiðilinn”, segir Egill.
Í frétt Bloomberg segir að alþjóðlegir fjárfestar séu að selja krónuna vegna áhyggna um erlenda skuldastöðu íslenska hagkerfisins, á sama tíma og fjármálastofnanir um allan heim eru tregar í taumi að veita hvor annarri aðgang að lánsfjármagni. Á það er bent í frétt Bloomberg að gengi íslensku krónunnar hafi veikst töluvert í gær, þrátt fyrir 50 punkta vaxtahækkun Seðlabankans.
Á barnum á 101 hóteli í miðborg Reykjavíkur var verið að ræða nýjustu tíðindin í íslenskum efnahagsmálum, segir í umfjöllun Bloomberg.
„Í Bandaríkjunum eða á evrusvæðinu, gæti fólk ekki sagt þér hvert gengið væri”, segir Frosti Ólafsson, hagfræðingur Viðskiptaráðs, yfir quesdilla og Víking bjór. „Hérna er þetta heitt umræðuefni, eitthvað sem fólk ræður um yfir kaffibolla”.