*

laugardagur, 31. júlí 2021
Innlent 30. nóvember 2004 13:13

Bónus gefur 20 milljónir

Ritstjórn

Jóhannes Jónsson hefur afhent Mæðrastyrksnefnd Reykjavíkur og Hjálparstarfi kirkjunnar 20 milljónir króna frá Bónusi. Féð verður notað til að aðstoða þá sem við bágust kjör búa nú þegar jólahátíðin er framundan. Hjálparstarf kirkjunnar mun vinna með Öryrkjabandalaginu og aðstoða fólk um land allt, Mæðrastyrksnefnd sinnir skjólstæðingum sínum í Reykjavík eins og hún hefur gert liðin 76 ár.

Samtals verða gefin fjögur þúsund gjafabréf frá verslunum Bónuss, hvert að andvirði 5.000 krónur. Rétthafar bréfanna geta keypt vörur að eigin vali í Bónus. Kaupa þarf fyrir alla upphæðina í einu.

Forsvarsmenn Bónuss treysta Hjálparstarfi kirkjunnar og Mæðrastyrksnefnd til að ráðstafa gjafabréfunum til þeirra íslensku heimila sem mest þurfa á aðstoð að halda.

Tvö ár eru síðan Bónus gaf þessum sömu félögum 25 milljónir króna og segir Jóhannes Jónsson, kaupmaður í Bónusi, í frétt á heimasíðu félagsins að honum sé vel ljóst að neyðin sé víða mikil hjá fjölskyldum um land allt. Hann segir að eigendum fyrirtæksins sé mikils virði að geta látið gott af sér leiða. Bónus hafi notið mikillar velgengni og velvildar í gegnum árin og fyrir það sé vert að þakka með þessum hætti.

,,Við fáum geysilega mörg bréf og símtöl með óskum um stuðning við fjölskyldur og einstaklinga og þykir okkur eðlilegra að láta fagfólk útdeila þessu fé því það þekkir aðstæður fólks betur en við," segir Jóhannes um þessa gjöf frá Bónusi.