Borgarastyrjöld ríkir innan Framsóknarflokksins, þetta sagði Eiríkur Bergmann, prófessor í stjórnmálafræði, í Silfrinu á RÚV í hádeginu. Umræðuefni þáttarins var m.a. nýstofnað Framfarafélag Sigmundar Davíðs Gunnlaugssonar, fyrrverandi formanns Framsóknarflokksins og áður forsætisráðherra. Rætt var um hvort stofnun félagsins væri upphafið að klofningu Framsóknarflokksins.
Viðmælendur þáttarins höfðu mismunandi skoðanir á framtaki Sigmundar en þannig taldi Trausti Reynisson, ritstjóri Stundarinnar að það væri litað af skoðunum hans um að hann verði að leiða eitthvað. „Manni sýnist þetta snúast um hans þörf til að hafa völd.“ Eins velti hann því fyrir sér hvort nafnið, Framfarafélagið, væri orðaleikur og vísaði til framboðs hans í næstu kosningum.
Orðræða Sigmundar minnir á Donald Trump
Jón Trausti sagði orðræðu Sigmundar á fundinum í gær minna á Donald Trump en Sigmundur sagði m.a. að stjórnmál væru að breytast í grundvallaratriðum og slíkt kallaði á viðbrögð. Benti Jón Trausti á að hann hafi þannig stillt kerfinu upp sem vandamálinu og eins hafi hann stillt fjölmiðlum upp sem hluta af kerfinu. „Þetta eru hlutir sem minna á stjórnmál Donalds Trump, en svo varar hann sjálfur við öfgaöfl í samlíkingu við Trump“.
