*

laugardagur, 29. janúar 2022
Innlent 2. nóvember 2021 17:31

Ó­breyttir fast­eigna­skattar von­brigði

FA segir að tillögur meirihluta borgarstjórnar um óbreyttan fasteignaskatt á atvinnuhúsnæði valdi miklum vonbrigðum.

Ritstjórn
Haraldur Guðjónsson

Reykjavíkurborg kynnti í dag fjármálaáætlun 2022-26 en þar er lagt til að álagningarhlutfall fasteignaskatta og lóðarleigu á næsta ári verði óbreytt. Álagningarhlutfall atvinnuhúsnæðis í Reykjavík nemur nú 1,60%, það hæsta meðal sveitarfélaga á höfuðborgarsvæðinu. Félag atvinnurekenda, FA, segir í færslu á Facebook að tillaga borgarstjórnarmeirihlutans valdi miklum vonbrigðum.

„Á sama tíma og fjöldinn allur af fyrirtækjum hefur átt í miklum rekstrarerfiðleikum og sum hafa engar tekjur haft af húsnæði sínu í langan tíma, ákveða borgaryfirvöld að viðhalda hæstu skattprósentu allra sveitarfélaga á höfuðborgarsvæðinu.“

Sjá einnig: Hár skattur að fæla fyrirtæki úr borginni?

FA bendir á að borgin hafi innheimt 14,6 milljarða króna í fasteignaskatta af atvinnuhúsnæði á síðasta ári, rúmlega fimm milljörðum meira en árið 2016.

„Áform borgarstjórnarmeirihlutans hjálpa fyrirtækjum ekki út úr Covid-kreppunni, svo mikið er víst,“ segir í færslu FA.

Samantekt FA á fasteignasköttum á atvinnuhúsnæði í tólf stærstu sveitarfélögunum á árunum 2020 og 2021.