Greiðslumiðlunarfyrirtækið Borgun, sem er að stærstum hluta í eigu Íslandsbanka, tók 200 milljónir króna af reikningi fyrirtækisins hjá Sparisjóð Vestmannaeyja í síðustu viku. Morgunblaðið greinir frá þessu.

Sem kunnugt er yfirtók Landsbankinn allar eignir og skuldbindingar sjóðsins í fyrradag eftir að Fjármálaeftirlitið hafði veitt honum fjögurra daga frest til þess að skila endurskoðuðum ársreikningum fyrir árið 2014. Þegar fréttir bárust af slæmri stöðu sjóðsins hófu margir viðskiptavina hans að taka fé sitt af reikningum sínum.

Fram kemur í Morgunblaðinu að síðasta fimmtudag hafi verið teknar út 350 milljónir króna og samsvarandi fjárhæð degi síðar. Voru því 700 milljónir króna teknar út á þessum tveimur dögum, en Borgun átti stærstan hluta fjárhæðarinnar.