*

föstudagur, 28. janúar 2022
Innlent 17. nóvember 2021 17:35

brandr sækir á nýja markaði

Ráðgjafafyrirtækið brandr opnaði útibú í Þýskalandi í vikunni og vinnur nú að innleiðingu brandr vísitölunnar í Noregi.

Ritstjórn
Friðrik Larsen, eigandi brandr, Robert Stulle, framkvæmdastjóri brandr Germany, og María Erla Marelsdóttir, sendiherra Íslands í Þýskalandi.
Aðsend mynd

brandr vísitalan, íslensk vörumerkjamælinga lausn, hefur nú sókn á nýja markaði og var þýskt útibú opnað formlega með móttöku í sameiginlegu samkomuhúsi norrænu þjóðanna í Berlín í vikunni. Á meðal boðsgesta var áhrifafólk í þýsku viðskiptalífi og lét það vel af kynningunni, að því er kemur fram í tilkynningu brandr.

María Erla Marelsdóttir, sendiherra Íslands í Þýskalandi, sagði í opnunarræðu að mælitækið myndi hjálpa þýskum fyrirtæki að meta þá verðmætu eign sem vörumerki eru og að það væri ánægjulegt að þessi Íslenska lausn væri núna komin til Þýskalands.
Innleiðing brandr vísitölunnar í Noregi er einnig hafin og má vænta frekari frétta af norska markaðnum á fyrsta ársfjórðungi næsta árs."

Ráðgjafafyrirtækið hefur sinnt ráðgjöf til erlendra orkufyrirtækja undir nafni Larsen Energy Branding og starfað með fjölmörgum stórum alþjóðlegum fyrirtækjum. Í því starfi hefur orðið vart við skort á aðgengilegum mælingum fyrir stjórnendur erlendis sem náðst hefur að koma til móts við með brandr vísitölunni og var það upphafið að þeirri hugmynd sem nú er að raungerast með opnun á fyrsta erlenda útibúi brandr. Lausnin byggir á eBBI (e. Energy branding Benchmarking index) en sú lausn vinnur nú þegar með yfir 2 milljónir gagnapunkta erlendis.

Afurð átta ára þróunarvinnu

brandr vísitalan er afurð átta ára þróunarvinnu Dr. Friðriks Larsen, dósents í Háskóla Íslands og eiganda brandr ráðgjafafyrirtækisins. brandr aðferðarfræðin gefur eigendum vörumerkja innsýn í stöðu sína á markaði. Hún mælir styrkleika og veikleika ímyndar, árangur og arðsemi markaðsstarfs og viðmið við önnur vörumerki (e. benchmarking). Lokaafurðin er 90 bls. skýrsla þar sem mikilvægar niðurstöður eru settar fram á skýran og auðskiljanlegan hátt og hjálpa forsvarsmönnum að taka betri ákvarðanir.

Í dag hafa yfir eitt hundrað íslensk fyrirtæki nýtt sér lausnina til þess að árangursmæla sín vörumerki. Stuðst er við vísitöluna við val á Bestu Íslensku vörumerkjunum. Vonir standa til þess að val á Bestu þýsku vörumerkjunum verði einnig orðið að veruleika innan fárra ára.

„brandr hefur að markmiði að auka veg og virðingu stefnumiðaðrar stjórnunar vörumerkja til aukinnar arðsemi fyrirtækja og hluti af þeirri sýn er að auka sýnileika faglegrar og vandaðrar vörumerkjastefnu hjá fyrirtækjum,“ segir í tilkynningu fyrirtækisins.