*

laugardagur, 24. júlí 2021
Innlent 8. júní 2021 15:20

Bréfin hækka þrátt fyrir risa bilun

Hlutabréf Fastly hafa hækkað umtalsvert frá opnun markaða vestanhafs þrátt fyrir bilun sem hafði áhrif á margar vinsælustu síður heims.

Ritstjórn
Spotify var meðal þeirra sem að bilunin hafði áhrif á.
epa

Samkvæmt Yahoo Finance hafa hlutabréf netþjónustufyrirtækisins Fastly hækkað töluvert frá opnun markaða vestanhafs þrátt fyrir að bilun í kerfi félagsins hafi valdið því að fjöldi vinsælla vefsíðna hafi legið niðri í um klukkutíma í morgun.

Bréf félagsins höfðu hækkað um rúm 11% þegar best lét í dag en gengi þeirra er nú um 4% hærra en við opnun markaða og standa nú í tæpum 53 Bandaríkjadollurum.

Bilunin hafði áhrif á ótalmargar vefsíður og smáforrit samkvæmt frétt CNN. Meðal þeirra vefsíða sem að lágu niðri má einna helst nefna CNN, BBC og vefsíða breskra stjórnvalda, gov.uk. Þá hafði bilunin einnig áhrif á Reddit, Spotify, Twitch og Amazon.

Þjónusta Fastly gengur út á að minnka tímann sem það tekur að hlaða vefsíður og smáforrit meðal annars með því að slétta úr umferð um vefsíður, sem að hjálpar einnig gegn árásum við svokölluðum DoS netárásum.