Bretum verður gert að greiða nálægt milljarði breskra punda í neyðarlán til Grikklands. Bretar hafa hingað til neitað að taka þátt í björgunaráætluninni fyrir Grikkland en Jean-Claude Juncker forseti framkvæmdastjórn Evrópu hefur nú rift samningnum sem átti að koma í veg fyrir að breskir skattgreiðendur tækju þátt í björgunaráætlunum. Þessu greinir the Telegraph frá.
George Osborne, fjármálaráðherra Bretlands reyndi í dag að berjast gegn áætlunum Evrópusambandsins um að bjarga Grikklandi frá fjármálahruni.
David Cameron hefur lofað á breska þinginu að vegna fyrri samningsins þurfi Bretland ekki að taka þátt í neyðarláninu og hefur notað það sem sönnun þess að hann geti endursamið um skilmála Bretlands innan sambandsins. Talsmenn Evrópusambandsins segja hins vegar ekkert að marka þann samning.
Bretland greiðir í kringum 14% af fjárhagsáætlun Evrópusambandsins, sem þýðir að ef Grikkir fá neyðarlán upp á 8,6 milljarða evra þurfi Bretar að borga í kringum 850 milljón pund í sjóðinn og eru litlar líkur á endurgreiðslu frá Grikkjum.
Kosið verður um það á næsta ári hvort Bretland verði áfram í Evrópusambandinu og gæti þessi þvingun Evrópusambandsins spilað stórt þar inn.
