Í júní breytist afgreiðslutími í hluta af útibúum Landsbankans. Þau 11 útibú sem þessar breytingar ná til eru öll staðsett á landsbyggðinni. Auk þess verða samhliða því gerðar breytingar á útibúi bankans við Hagatorg í Vesturbæ Reykjavík.
Samkvæmt tilkynningu frá Landsbankanum munu þessar breytingar aðlaga útibúin að breyttum aðstæðum í bankaþjónustu. Viðskiptavinir eru í auknum mæli farnir að nýta sér stafrænar lausnir til að sinna bankaviðskiptum og hefur heimsóknum þeirra í útibú fækkað.
Hér má sjá hvaða útibú stytta afgreiðslutíma sinn, gamla afgreiðslutímann og þann nýja:
- Breiðdalsvík 12.30-16.00 12.00-15.00
- Djúpivogur 11.00-16.00 12.00-15.00
- Hvammstangi 9.00-16.00 12.00-15.00
- Kópasker 12.00-16.00 12.00-15.00
- Neskaupstaður 9.00-16.00 12.00-15.00
- Patreksfjörður 9.00-16.00 12.00-15.00
- Raufarhöfn 12.00-15.30 12.00-15.00
- Skagaströnd 9.00-16.00 12.00-15.00
- Vopnafjörður 12.30-16.00 12.00-15.00
- Þorlákshöfn 9.00-16.00 12.00-15.00
- Þórshöfn 12.30-16.00 12.00-15.00
Landsbankinn hefur á undanförnum mánuðum kynnt fjölmargar nýjar stafrænar þjónustuleiðir. Meðal annars geta viðskiptavinir stillt sjálfir yfirdráttinn í netbankanum og lokið greiðslumati vegna íbúðalána á netinu. Að sögn Landsbankans verða svo fleiri nýjungar kynntar til sögunnar á næstunni.
Þessar breytingar munu koma til framkvæmda á tímabilinu 11.-29. júní og nánari upplýsingar verða aðgengilegar í viðkomandi útibúi eða afgreiðslu. Hægt er að nálgast lista yfir þau útibú sem munu taka upp breytta afgreiðslutíma á vef Landsbankans.
Samhliða breyttum afgreiðslutíma verður útibú bankans við Hagatorg gert að afgreiðslu frá útibúinu við Austurstræti 11. Bakvinnslustörf í útibúinu við Hagatorg verða lögð niður og bakvinnslustörfum í höfuðstöðvum bankans fækkar. Starfsfólki í útibúinu við Hagatorg mun fækka en samkvæmt tilkynningunni ættu viðskiptavinir ekki að verða varir við miklar breytingar á þjónustu.